سنة الامتياز في طب الأسنان: متضيعهاش!

السلام عليكم ورحمة الله وبركاته .

يا دكتور الامتياز،

لو انت في سنة الامتياز في طب الأسنان او بتستعد لها، مش مهم انت كنت متفوق في الكلية ولا لا. و خليني اقولك ان السنة دي مش مجرد محطة و تعدي ، لا !! دي السنة اللي تقدر ان شاء الله تخليها نقطة انطلاق ليك. و انا هنا مش علشان اقولك كلام تنمية بشرية ، انا هنا عشان اعرفك علي خطوط عريضة تقدر تمشي عليها او تعدلها حسب ظروفك ، فنبدأ بسم الله ...

تنويه : كلامي موجه لكلا الجنسين دكتورة الأسنان او طبيب الاسنان.

حدد هدف

انك تخلي لنفسك بوصلة و متكنش تايه دي اول خطوة للنجاح في اي حاجة هي انك تعترف ان عندك هدف. 

لان الهدف اللي هتسعي له هيخليك متقولش "مش فارقه" او "كله زي بعضه" . لا، انت مختلف، وانت هتستغل سنة الامتياز .طب ازاي؟؟ 

اسال نفسك يا طبيب الاسنان

•  ايه اللي عايز اتعلمه في السنة دي؟  
•  ايه نقاط القوة اللي عندي؟ وازاي اطورها؟  
•  ايه نقاط الضعف اللي محتاجة تعديل؟  
• ايه الحلم اللي نفسك تحققه بعد 5 سنين؟

اكتب اجابات الاسئلة دي وحطها قدامك، عشان تكون خارطة طريقك.

التدريب العملي

في سنة الامتياز، هتقابل نوعين من زمايلك:  

الاول بيكتفي بالحد الادنى من التدريب و طبيب اسنان  بيدور على كل فرصة ممكنة عشان يتدرب اكثر.  

وانت عايز تكون النوع التانى، مش كدا؟؟

يبقى متكتفيش بالتدريب في المستشفى او الجامعة. انزل عيادات خاصة، دور على مراكز كبيرة تقدر تتعلم فيها.

استثمر في نفسك

طبيب الاسنان المتميز مش بيعتمد بس على اللي اتعلمه في الكلية. لا ، دا بيدور علي كل جديد ، لان العلم بيتطور كل يوم، ولازم يواكب التغيير.  

اسال نفسك

• ايه المهارات اللي ناقصاني؟  
• ايه الجديد في مجالي؟  

وابدا تدور على كورسات. مش شرط تكون الكورسات غالية. في حاجات مجانية على الانترنت هتفيدك جدا ان شاء الله، و مش شرط تكون كلها في اختصاص طب الاسنان لان فيه مهارات تانية هتحتاجها في عيادتك كإدارة العيادات مثلا ، عندك امثلة على الكورسات اللي هتفيدك:  

- زراعة الاسنان Implant.  

- التركيبات الثابتة Fixed prothodontics.  

- ادارة العيادات.  

شبكة العلاقات  

تعرف المقولة دي: "شبكة علاقاتك هي راس مالك"؟ دي مش مجرد كلام تنمية بشرية، لا ،دي حقيقة!

• خليك نشيط على LinkedIn وشارك شغلك وانجازاتك.
• متخافش تسال وتتعلم من زملائك اللي سبقوك في المجال ، و خليك علي تواصل معاهم لان كل شخص بتقابله في رحلتك ممكن يكون مفتاح لفرصة عظيمة قدام.

التوازن سر النجاح  

كلمة السر في الوسطية في كل شيء.  

•  نظم وقتك بين الشغل والتعلم والراحة.  
•  مارس رياضة بسيطة يوميا.  
•  اهتم بصحتك النفسية، لانها بتاثر على ادائك شغلك. 

افتكر: النجاح مش انك تشتغل كتير، النجاح هو انك تشتغل بذكاء وتعرف امتى ترتاح.  

متخليش خوفك يعطلك ، كن جريئًا  

خليك جريء ، و اطلب المساعدة لو محتاج، جرب، اتعلم من اخطائك، ودايما افتكر انك طول عمرك هتفضل تتعلم. 

قاعدة :  

"كل حالة صعبة بتقابلها هي فرصة جديدة لتتعلم حاجة جديدة."

كلمة اخيرة

افتكر دايما: 

النجاح مش بيجي صدفة و لا التميز مش بيجي بالساهل.

وانت الوحيد اللي تقدر تغير حياتك للافضل.

فترة الامتياز متخليهاش مجرد سنة، دي فرصة عظيمة عشان تطور من نفسك.

ابدا النهارده !!